البحث عن شعار في بلد شعارات ... شعارات
في يوم من ذات الأيام كنت اقرأ جريدتي فشاهدت خبراً غريبا عجيبا :
الحزب الوطني الديموقراطي - صاحب الفكر الجديد - يبحث عن شعار جديد (برضو اصل كله جديد x جديد) !!!!
يا للهول - على راي يوسف بيه وهبي - انا مش متخيل الكلام ده ... حد يخبطني باي حاجة علشان افوق ... أو حد عاقل يقول ان دا كدب وتحريض وادعاء اخر مغرض من المعارضة مثلا وبيفتروا على منبع الديموقراطية في مصر والوطن العربي ... ما اطولش عليكوا - قولوا طول - اتكلت على الهادي ودخلت موقع الحزب العامر ... لقيت دا بحق وحقيقي ...
فلتبرق السماء وترعد ولتهبط صاعقة مدوية على نافوخي - دا على رأيي انا صخصيا - المهم انا مش كاتب الكلام ده علشان ابلغكم ... حاشا وكلا ...
انما طبعا علشان اقترح شوية شعارات من اللي هما ... دي بلدنا برضو يا رجالة وما يصحش نتخلى عن الوطن وننفض لندائه ... الحزب محتاج شعار
وأدعوكم نفر نفر للمشاركة وتأليف وأرسال الشعارات للوطن => من هنا
ولازم نشارك دا مش استفتاء ولا انتخابات زي قلتها ... انما دا شعار هيخدمنا كلنا في المرحلة القادمة
لازم تشارك يا مواطن بشعار ... تعاطفك لوحده - طبعا - مش كفاية (ولا بلاش كفاية دي بتعمل حساسية)
واظن بل انا متاكد ان دي شغلانة سهلة ... ما فيش اكتر من الشعارات في بلدنا احنا تقريبا 80 مليون وعندنا - على اقل تقدير - شعار لكل مواطن
اقتراحاتي :
- المواطنة أساس الحكم (دا أكتر واحد مطابق لشروط ومواصفات الحزب)
- يحيا الحزب الميري
- الوطني فوق الجميع
- الحزب فوق الأمة ... والأمة بتحب الحزب
عموما ... اديني باكرر ... لازم تشاركو ا
لأن يا أخواني
"كل حكومة لابد لها من شعب تحكمه ... وكل شعب لابد له من حكومة تشكمه , فهنيئا للشعب بحكومته وللحكومة بشعبها"
ولن اجد ختاما لكلامي هذا افضل من :
ما شربتش من نيلهـا .... طب جربت تغنيلها
ما مشيتش في دواحيها .... طب ما كبرتش فيها
وعجبي ...
6 comments:
بصراحه يا ميكو مقال حلو خالص بس احلي حته جملة كل حكومه لازم ليها شعب تحكمه و كل شعب لازم ليه حكومه تشكمه انا بصراحه ضحكت موت لما قريت الحته ده
علي فكره ده بداية طريق حبايبنا الحلوين شد حيلك
اشعر بما تكتبه جدا
فها هي شعارات الديموقراطية المزيفة في كل مكان
واذا كان هناك من يعاني منها فنحن اولهم فتحت ظل ديموقراطية بوش والصهاينة لم يبق للديموقراطية معنى ولا هدف
لازم كلنا طبعا نقف مع الحزب وكلوا يقول الى فى دماغه بامانه والا..........
احنا عندنا ايه اغلى من الحزب الوطنى الحاكم !!!!
ااااااااااااه يا حزبى
يا بلدي .. يا فينو يا كايزر
وقوم يا مصري .. مصر زهقت منك .
وكل الود يا سفير الحرية .
اعلان للحزب الوطنى نشر فى جريدة الأهرام الثلاثاء بسبب انتخابات الشورى
احنا ونوابنا عايشين معاك فى كل مدينة "شرم" وقرية "مراقيا " .....برنامجنا بيضمن حريتك ويأمن مستقبلك ومستقبل أولادك
"كمان الأولاد طب كان فين البرنامج ده من 30 سنة أه نسيت دلوقتى بقى فى فكر جديد يعنى نحاسبهم كمان 30 سنة"
برنامج يلتزم بكل تعهدات الحزب فى انتخابات مجلس الشعب الأخيرة
"أنا مش فاكر التعهدات دى يمكن قصدهم ضرب القضاة ولا التحرش بالصحفيات ولا ايه بالظبط لامؤاخذة أصلى مش بتاع فكر جديد وبالتالى مش هفتكر"
والخلاصة فليكن الشعار
ماتقولش ايه اديتنا مصر
وقول هتدى ايه للعزبة
دا كلام جرجس وعم نصر
يبقى انت أكيد أكيد فى مصر
وتيجى نبنيها ومانجيش نواحيها
الخائفون لايصنعون حضارة فاقعدوا فى بيوتكم أحسن لكم
اللى يشرب من نيلها لازم يرجعلها تانى
ملحوظة للشعب من الحزب:
دا للسياح اما انتوا نطوا فيه
اشكر كل الاخوةوالاخوات الذين واللاتي شرفوني بتعليقاتهم .... بس انا عاتب على كل من لم يسجل اقتراحاته ... مش قلنا دي بلدنا يا رجالة ويا ستات ... لا شدوا حيلكوا والحاضر يعلم الغايب .... الوقت بيعدي والخطر بيزيد ... مش كده ولا ايه
monmon
اولا شكرا للمجاملة
ثانيا الجملة - بصراحة - مش من بنات افكاري انا سمعتها في مكان ما ... بس كويس انك ضحكت في زمن عز فيه الضحك ... وان كان هناك كم من المضحكات في بلدنا المحروسة لا يحصى
ثالثا فينك ... انت متاكد انهم خطفوا واحد بس
yasmina
منوراني دايما
يا ياسمينة يا عزيزتي فليذهب ذلك المعتوه (بوش) حيث القت ومعه الأخوة الصهاينة طبعا ... بس الناس دي - شئنا أم أبينا - عندها ديموقراطية في بلدها ومع شعبها اللي عايش زي الفل هما غير ديموقراطيين مع الأخرين وطبعا بالذات العرب والمسلمين ... يا ريت يا ستي نبقى ديموقراطيين مع شعوبنا وغير كده مع الناس التانيين الوحشين ... لكن اللي بيحصل هو العكس تماما ... مش كده برضو
mario
شكرا يا أخي
و .... ااااااااااااه يا حزبى
حزبي بيوجعني
محمد العدوي
للأسف مش باعرف ازغرت ... كنت اكيد عملتها ... طبعا نورت
و ... وقوم يا مصري .. مصر زهقت منك ... وربنا يجعل كلامنا خفيف على جلالته
أبو لهب
شرفت اخي
بس شكلك بتتكلم بجد !!! في موضوع - بالتاكيد - جاد جدا
عم جرجس وعم نصر ولاد مصر بيسلموا عليك جامد جدا
و .... تبت يدك (اوعى تزعل القافية حكمت !!!)
Post a Comment