في ذكرى وكستنا ونكستنا العظيمة

هزم الجيش المصري في حرب الأيام الستة المعروفة لدينا - من باب الدلع - بالنكسة !!!

خطأ شائع :

معروف للعامة والخاصة وحتى الأطفال ان خير أجناد الأرض لم يهزموا في تلك الحرب , لماذا لأنه (الجيش المصري) لم يحارب من أساسه ولا دي حرب من أصله

من هزم في هذه الحرب العنترية هم العرب - 5 دول بس !!! - بتفكيرهم العقيم والفاسد ... من هزم وتعرى وفُضح هو النظام الديكتاتوري الغبي اللي سمح للفساد والقذارة ان تغطي وجه - بل كل - الوطن طالما انه متربع على كرسيه يمارس الزعامة في افضل - أو أاسوء - صورها ويعتقد انه يبني مصر وينميها !!!

النظام دا لسه بيعمل وبكفاءة شديدة يُحسد عليها ... هي بس فترة هدنة صغيرة حررنا فيها ارضنا وعبرنا ... بس بعد ما عبرنا رجعنا غرقنا تاني وبالقوى

احنا لسه في حالة نكسة ومش اي نكسة ... هزيمة 67 كانت صادمة نتيجة للهزيمة في حد ذاتها وايضا نتيجة للمفارقة بين اكاذيب النظام وبياناته المضروبة عن طيارات العدو اللي بتقع زي الحمام واليمام ببندقية صياد متمكن !!! وبين واقع ما حدث من تراجع وخيبة ... البلد بعد الصدمة ابتدت تفوق وتحس وتتغير وابتدينا نبني جيش ... وربنا اكرمنا في 73 طبعا

أنما نكستنا ووكستنا الحالية تختلف ... من حيث انها .. مستمرة .. هادية .. غير صادمة (بمعنى انك بتتقبل الأمر الواقع مع الوقت) .. تزداد بشدة وبعنف احيانا ... كمان الحرب المباشرة مقدور عليها ... اخرها سلاح وجنود أسود عقيدتهم القتالية راسخة ... العدو فيها معروف وواضح ... بينما دلوقت تحارب مين ؟ ... ومين معانا ؟ ومين مع التانيين ؟ ومين احنا ؟ ومين التانيين ؟

ما علينا ...

اسيبكم مع عم جاهين ... والفاجومي

على اسم مصر التاريخ يقدر يقول ما شاء
أنامصر عندي أحب وأجمل الأشياء
باحبها وهي مالكه الأرض شرق وغرب
وباحبها وهي مرميه جريحة حرب
باحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلقيني جنبها في الكرب
والنبض ينفض عروقي بألف نغمة وضرب
على اسم مصر

==================

الحمد لله خبطنا
تحت بطاطنا
يا محلا رجعه ظباطنا
من خط النار
يا اهل مصر المحميه
بالحراميه
الفول كتير والطعميه
والبر عمار
والعيشه معدن واهي ماشيه
اخر اشيا
مادام جنابه والحاشيه
بكروش وكتار
ح تقول لى سينا وما سينا شي
ما تدوشناشي
ما ستميت اوتوبيس ماشى
شاحنين انفار
ايه يعني لما يموت مليون
او كل الكون
العمر اصلا مش مضمون
والناس اعمار
الحمدلله وأهي
ظاطت
والبيه حاطط
في كل حته
مدير ظابط
وإن شالله
حمار
ايه يعني فى العقبه جرينا
ولا ف سينا
هى الهزيمه تنسينا
اننا احرار
ايه يعني شعب ف ليل ذلة
ضايع كله
دا كفاية بس اما تقول له
احنا الثوار
الحمد الله ولا حولا
مصر الدوله
غرقانة فى الكدب علاوله
والشعب احتار
وكفايه اسيادنا البعدا
عايشين سعدا
بفضل ناس تملا المعده
وتقول اشعار
اشعار تمجد وتماين
حتى الخاين
وان شا الله يخربها مداين
عبد الجبار

Ave Maria

السلام لك أيتها الممتلئة نعمة

البحث عن شعار في بلد شعارات ... شعارات

في يوم من ذات الأيام كنت اقرأ جريدتي فشاهدت خبراً غريبا عجيبا :

الحزب الوطني الديموقراطي - صاحب الفكر الجديد - يبحث عن شعار جديد (برضو اصل كله جديد x جديد) !!!!

يا للهول - على راي يوسف بيه وهبي - انا مش متخيل الكلام ده ... حد يخبطني باي حاجة علشان افوق ... أو حد عاقل يقول ان دا كدب وتحريض وادعاء اخر مغرض من المعارضة مثلا وبيفتروا على منبع الديموقراطية في مصر والوطن العربي ... ما اطولش عليكوا - قولوا طول - اتكلت على الهادي ودخلت موقع الحزب العامر ... لقيت دا بحق وحقيقي ...

فلتبرق السماء وترعد ولتهبط صاعقة مدوية على نافوخي - دا على رأيي انا صخصيا - المهم انا مش كاتب الكلام ده علشان ابلغكم ... حاشا وكلا ...

انما طبعا علشان اقترح شوية شعارات من اللي هما ... دي بلدنا برضو يا رجالة وما يصحش نتخلى عن الوطن وننفض لندائه ... الحزب محتاج شعار

وأدعوكم نفر نفر للمشاركة وتأليف وأرسال الشعارات للوطن => من هنا

ولازم نشارك دا مش استفتاء ولا انتخابات زي قلتها ... انما دا شعار هيخدمنا كلنا في المرحلة القادمة

لازم تشارك يا مواطن بشعار ... تعاطفك لوحده - طبعا - مش كفاية (ولا بلاش كفاية دي بتعمل حساسية)
واظن بل انا متاكد ان دي شغلانة سهلة ... ما فيش اكتر من الشعارات في بلدنا احنا تقريبا 80 مليون وعندنا - على اقل تقدير - شعار لكل مواطن

اقتراحاتي :

- المواطنة أساس الحكم (دا أكتر واحد مطابق لشروط ومواصفات الحزب)

- يحيا الحزب الميري

- الوطني فوق الجميع

- الحزب فوق الأمة ... والأمة بتحب الحزب

عموما ... اديني باكرر ... لازم تشاركو ا

لأن يا أخواني

"كل حكومة لابد لها من شعب تحكمه ... وكل شعب لابد له من حكومة تشكمه , فهنيئا للشعب بحكومته وللحكومة بشعبها"

ولن اجد ختاما لكلامي هذا افضل من :

ما شربتش من نيلهـا .... طب جربت تغنيلها
ما مشيتش في دواحيها .... طب ما كبرتش فيها

وعجبي ...

مفيش احسن من لبن الأم

بغض النظر عن مدى مشروعية تلك الفتوى من عدمها ... او مدى جواز تعميمها من خصوصيتها بتلك السيدة ومولى زوجها من عدمه ... تلك المسائل متروكة بالطبع للعلماء وللمؤسسة العريقة وهي ازهر مصر الشريف

اتسائل فقط ... تُرى كم من موبقات ... تحرشات ... او قل زنا قد تم بالاستناد لذلك الـ ... ؟؟!!!

النظام المصري

!!!اهو دا اللي صار ... و أدي اللي كان مالكش حق ... مالكش حق تلوم عليا ... تلوم عليا ازاي يا سيدنا ؟؟

!!!وخير بلدنا ماهوش في ايدنا

مش عارف ايه اللي فكرني بالاغنية او الطقطوقة دي ؟ بس اهي في دماغي بدندنها من كام يوم كده , عارفين انها الحان الفنان المصري فنان الشعب اللي ما يتعوضش عمنا سيد درويش ... ويا سلام عليها بصوت ستنا فيروز روعة

للي عايزها => أهو دا اللي صار

المهم نرجع مرجوعنا للنظام المصري ... اقسم بالله العظيم انني لا اعني "بالنظام المصري" نظامنا الحاكم اللي هو ميت فل وعشرة والناس بيعملوا اللي عليهم وزيادة حبتين او تلاته والبرنامج الانتخابي يسير في خطى واثقة - زي صاحبه - والكفاح دوار ولا صوت يعلو على صوت المعركة التنموية التقدمية

!!!امال اقصد ايه بالنظام المصري ؟

نظامنا احنا المصريين - اهمه - نظام حياتنا تفكيرنا تصرفاتنا اللي هو نظام غريب عجيب ممكن نتقدم بطلب للجنة الخاصة باختيار عجائب الدنيا الجديدة علشان يضيفوه خصوصا ان هما ناويين يستبعدوا الاهرامات واهو ما نزعلش الاخ فاروق حسني اللي كان متاثر طحن

كل شعوب الكوكب لما كانت اولا تزال خاضعة لحكم غير ديموقراطي بتحاول تعترض وتقاوم بالفعل مش بس بالقول ولو كان هذا الفعل هو المقاومة السلمية زي ما عمل السيد غاندي ضد الانجليز وزي ما عملنا ضدهم وضد اللي قبلهم مع ان مقاومتنا ما كنتش سلمية ... لكن يبدو انه منذ 26 عاما تقريبا - والى ما شاء الله - اصابتنا البلادة غير المبررة ظاهريا واصبحنا شعب داجن يأمر فيطيع يعتقل فيخضع يغتصب فيستمرئ ... ما عدا قلة تتميز بلسان طويل لاذع يسخرون وينتقدون بلوذعية معروفة عن شعبنا الذي كان ذكيا لماحا وابن نكته سابقا حتى اصابه فيروس الخنوع والامتثال فهل من طبيب - بعده سبحانه - يمكنه مداواة هذا الشعب ؟ ولو حتى عن طريق جراحة عاجلة لاستأصال الغدة المفرزة لهرمون الخضوع والذل
شيئ اخر غريب عجيب ... يوجد هناك مركز من المراكز العصبية في مخ افراد هذا الشعب يزيد من افراز هرمون الابداع والخلق المؤدي للنجاح والتفوق ... ولكن للأسف لا يعمل هذا المركز العصبي ولا يفرز هذا الهرمون إلا خارج أرض المحروسة !!!! يبدع المصريون ويتفوقون خارج مصر والشذوذ هنا يثبت القاعدة ولا ينفيها ... وبنفس هذا المبدأ يلتزم الأخوة المصريين بكل القوانين كبرت او صغرت خارج بلادنا ويقفون في اشارة المرور برغم عدم وجود عسكري ويكسرونها في المحروسة ويشتمون العسكري الغلبان لأنه مش عارف بيكلم مين ... او يضربونه لو كانوا من لاعبي الكرة ... وللاسف ينطبق هذا ايضا - العكس بالعكس - على الأجانب عندما يقيمون في مصر اكتر من 40 يوم من عاشر القوم بقى

وهناك الكثير والعديد والمزيد من العجائب والغرائب التي نعرفها جميعا عن شعبنا الطيب